ભૂતપૂર્વ કેન્દ્રિય ગૃહ રાજ્યમંત્રી શ્રીપ્રકાશ જયસ્વાલનું 81 વર્ષની વયે નિધન

ભૂતપૂર્વ કેન્દ્રીય ગૃહ રાજ્યમંત્રી અને કોંગ્રેસના વરિષ્ઠ નેતા શ્રીપ્રકાશ જયસ્વાલનું શુક્રવારે 81 વર્ષની વયે નિધન થઇ ગયું હતું. તેમણે કાનપુરમાં અંતિમ શ્વાસ લીધા. મુખ્યમંત્રી યોગી આદિત્યનાથે તેમના સોશિયલ મીડિયા હેન્ડલ X પર એક પોસ્ટ દ્વારા તેમના નિધન પર શોક વ્યક્ત કર્યો છે. મુખ્યમંત્રી યોગીએ કહ્યું કે, ‘ભૂતપૂર્વ કેન્દ્રીય મંત્રી અને વરિષ્ઠ રાજકારણી શ્રીપ્રકાશ જયસ્વાલનું નિધન અત્યંત દુઃખદ છે. તેમને વિનમ્ર શ્રદ્ધાંજલિ! હું ભગવાન શ્રી રામને પ્રાર્થના કરું છું કે તેઓ દિવંગત આત્માને પોતાના શ્રી ચરણોમાં સ્થાન આપે અને શોકગ્રસ્ત પરિવારને આ અપાર દુઃખ સહન કરવાની શક્તિ આપે.’

ભૂતપૂર્વ કેન્દ્રીય મંત્રી શ્રીપ્રકાશ જયસ્વાલ લાંબા સમયથી રાજકારણમાં સક્રિય હતા. તેમણે કાનપુરમાં ન માત્ર કોંગ્રેસ પાર્ટીની સ્થિતિને મજબૂત બનાવી, પરંતુ કેન્દ્રીય મંત્રી તરીકે કાનપુરમાં અનેક મોટા પ્રોજેક્ટ્સ પણ લાવ્યા. કાનપુરથી સતત 3 ટર્મ સુધી સંસદ સભ્ય અને 10 વર્ષ સુધી કેન્દ્રીય મંત્રી તરીકે સેવા આપનારા શ્રીપ્રકાશ જયસ્વાલનું ગઈકાલે મોડી રાત્રે અવસાન થયું હતું. પોખરપુર સ્થિત તેમના નિવાસસ્થાને તેમની તબિયત લથડતા તેમના પરિવારે તેમને કાર્ડિયોલોજી ઇન્સ્ટિટ્યૂટમાં લઈ ગયા હતા, જ્યાં ડૉક્ટરોએ તેમના મૃત્યુની પુષ્ટિ કરી.

શ્રીપ્રકાશ જયસ્વાલનો જન્મ કાનપુરમાં થયો હતો. તેમણે 28 એપ્રિલ, 1967ના રોજ માયા રાણી જયસ્વાલ સાથે લગ્ન કર્યા હતા. આ દંપતીને બે પુત્રો, એક પુત્રી અને બે પૌત્ર છે. શ્રીપ્રકાશ જયસ્વાલે 1989માં કાનપુર શહેરના મેયર તરીકે પોતાની રાજકીય કારકિર્દીની શરૂઆત કરી હતી. ત્યારબાદ તેઓ રાષ્ટ્રીય રાજકારણમાં આવ્યા. તેમણે 2000 થી 2002 સુધી ઉત્તર પ્રદેશ કોંગ્રેસ સમિતિના પ્રમુખ તરીકે પણ સેવા આપી હતી. આ દરમિયાન, તેમણે સંગઠનનો વિસ્તાર કરવા અને કોંગ્રેસ પક્ષના મૂળિયા મજબૂત કરવા માટે કામ કર્યું.

UPAના પ્રથમ કાર્યકાળ દરમિયાન શ્રીપ્રકાશ જયસ્વાલને ગૃહ રાજ્યમંત્રી તરીકે નિયુક્ત કરવામાં આવ્યા હતા. તેમણે 23 મે, 2004 થી 22 મે, 2009 સુધી આ પદ સંભાળ્યું. મનમોહન સિંહ સરકારમાં તેમણે આંતરિક સુરક્ષા, કાયદો અને વ્યવસ્થા અને ગૃહ મંત્રાલય સંબંધિત મહત્ત્વપૂર્ણ જવાબદારીઓ નિભાવી હતી. UPA-2માં તેમણે 19 જાન્યુઆરી 2011 થી 26 મે 2014 સુધી, કોલસા મંત્રી તરીકે સેવા આપી. 2014ની ચૂંટણીમાં તેમને હારનો સામનો કરવો પડ્યો હતો.

શ્રીપ્રકાશ જયસ્વાલ પહેલી વાર 1999માં કાનપુર લોકસભા બેઠક પરથી સાંસદ તરીકે ચૂંટાયા હતા. ત્યારબાદ તેઓ 2004 અને 2009માં સતત જીત્યા. તેમણે સતત 15 વર્ષ સુધી સંસદમાં કાનપુરનું પ્રતિનિધિત્વ કર્યું. ત્યારબાદ 2014માં મોદી લહેર દરમિયાન તેમને હારનો સામનો કરવો પડ્યો.

ઉત્તર પ્રદેશ કોંગ્રેસના પ્રદેશ પ્રમુખ અજય રાયે પણ શ્રીપ્રકાશ જયસ્વાલના નિધન પર શોક વ્યક્ત કર્યો છે. તેમના સોશિયલ મીડિયા હેન્ડલ X પર પોસ્ટ કરતા કહ્યું કે, ‘ઊંડા શોક સંવિદના પૂર્વક ભૂતપૂર્વ કેન્દ્રીય મંત્રી શ્રીપ્રકાશ જયસ્વાલના નિધનના સમાચાર ખૂબ જ દુઃખદ છે. કાનપુર અને UPના રાજકારણમાં તેમનું યોગદાન અવિસ્મરણીય રહેશે. તેમને હંમેશાં આપણા બધાના મોટા ભાઈ, સરળ સ્વભાવના અને સાચા નેતા તરીકે યાદ કરવામાં આવશે. બાબા વિશ્વનાથ દિવંગત આત્માને શાંતિ આપે અને આ મુશ્કેલ સમયમાં પરિવારને ધીરજ પ્રદાન કરે.’