Urvil Patel: ગુજરાતના બેટ્સમેન ઉર્વિલ પટેલનું શાનદાર ફોર્મ ચાલુ છે. ઉર્વિલ પટેલે સૈયદ મુશ્તાક અલી T20 ટ્રોફીમાં એક અઠવાડિયાની અંદર પોતાની બીજી વિસ્ફોટક સદી ફટકારી. તેણે મંગળવારે ઉત્તરાખંડ સામે માત્ર 36 બૉલમાં સદી ફટકારી હતી. ઈન્દોરના હોલ્કર સ્ટેડિયમમાં રમાયેલી મેચમાં પટેલે 41 બોલમાં 8 ચોગ્ગા અને એક છગ્ગાની મદદથી અણનમ 115 રન બનાવ્યા હતા. તેની સ્ટ્રાઈક રેટ 280.48ની રહી. આ અગાઉ ઉર્વિલ પટેલે ત્રિપુરા વિરૂદ્ધ T20 સદી માત્ર 28 બૉલમાં ફટકારી હતી. ઉર્વિલની ચર્ચા એટલે પણ વધારે થઈ રહી છે કારણ કે તેને IPL 2025ની મેગા ઓક્શનમાં કોઈ ખરીદનાર મળ્યો નથી.
તમને જણાવી દઈએ કે ગુજરાતે મેચમાં પ્રથમ બૉલિંગ કરવાનો નિર્ણય કર્યો હતો. ઉત્તરાખંડે રવિકુમાર સમર્થ (54), આદિત્ય તારે (54) અને કુણાલ ચંદેલા (43)ની ઇનિંગ્સના આધારે 20 ઓવરમાં 7 વિકેટ ગુમાવીને 182 રન બનાવ્યા હતા. જવાબમાં ગુજરાતે પટેલની તોફાની અણનમ સદીની મદદથી 41 બૉલ બાકી રહેતા 8 વિકેટથી મેચ જીતી લીધી હતી. ગુજરાતે 13.1 ઓવરમાં 2 વિકેટ ગુમાવીને લક્ષ્યાંક હાંસલ કરી લીધો હતો.
આ સદી સાથે ઉર્વિલ પટેલે સૈયદ મુશ્તાક અલી ટ્રોફીના વિશિષ્ટ ક્લબમાં જગ્યા બનાવી લીધી છે. ઉર્વિલ પટેલ સૈયદ મુશ્તાક અલી ટ્રોફીની એક સીઝનમાં 2 સદી ફટકારનાર સાતમો બેટ્સમેન બન્યો છે. ગયા વર્ષે પંજાબના અભિષેક શર્માએ આ કારનામું કર્યું હતું.
SMATની એક સીઝનમાં બે સદી ફટકારનાર બેટ્સમેન
ઉન્મુક્ત ચંદ, દિલ્હી, 2013
કરુણ નાયર, કર્ણાટક, 2018
ઇશાન કિશન, ઝારખંડ, 2019
શ્રેયસ અય્યર, મુંબઈ, 2019
રૂતુરાજ ગાયકવાડ, મહારાષ્ટ્ર, 2022
અભિષેક શર્મા, પંજાબ, 2023
ઉર્વિલ પટેલ, ગુજરાત, 2024*
ઉર્વિલ પટેલે ઉત્તરાખંડ સામે સદી ફટકારીને વધુ એક અનોખી સિદ્ધિ મેળવી હતી. ઉર્વિલ પટેલ T20 ક્રિકેટમાં ચોથી સૌથી ઝડપી સદી ફટકારનાર ભારતીય બેટ્સમેન બની ગયો છે. તેણે પૂર્વ ભારતીય ઓલરાઉન્ડર યુસુફ પઠાણનો રેકોર્ડ તોડ્યો હતો. પઠાણે 2010માં મુંબઈ ઈન્ડિયન્સ વિરુદ્ધ 37 બૉલમાં સદી ફટકારી હતી. ઉર્વિલ પટેલે 36 બૉલમાં સદી ફટકારીને તેને તબાહ કરી દીધો હતો.