લાલકૃષ્ણ અડવાણીની તબિયત ફરી લથડી, દિલ્હીની Apollo હૉસ્પિટલમાં દાખલ

Lal Krishna Advani admitted to Apollo hospital: ભાજપના વરિષ્ઠ નેતા લાલકૃષ્ણ અડવાણીની તબિયત ફરી એક વખત બગડી છે. તેમને આજે એટલે કે શનિવારે દિલ્હીની Apollo હૉસ્પિટલમાં દાખલ કરવામાં આવ્યા છે. Apolloના સૂત્રોના જણાવ્યા અનુસાર, તેમની હાલત હાલ સ્થિર છે. મેડિકલ બુલેટિન ટૂંક સમયમાં જાહેર કરવામાં આવશે. લાલકૃષ્ણ અડવાણી 97 વર્ષના છે. છેલ્લા 4-5 મહિનામાં આ ચોથી વખત છે જ્યારે તેમને હૉસ્પિટલમાં દાખલ કરવામાં આવ્યા છે.

આ અગાઉ તેમને 3 જુલાઈએ દિલ્હીની Apollo હૉસ્પિટલમાં દાખલ કરવામાં આવ્યા હતા. 26 જૂને તેમને દિલ્હીની AIIMSમાં દાખલ કરવામાં આવ્યા હતા. તેમને ન્યૂરોલોજી વિભાગના નિરીક્ષણ હેઠળ રાખવામાં આવ્યા હતા. બીજા દિવસે તેમની નાની સર્જરી કરવામાં આવી. થોડા સમય બાદ તેમને રજા આપી દેવામાં આવી હતી.

લાલકૃષ્ણ અડવાણી છેલ્લા કેટલાક સમયથી સ્વાસ્થ્ય સંબંધિત સમસ્યાઓથી ઝઝૂમી રહ્યા છે. આ જ કારણ છે કે આ દિવસોમાં તેઓ પોતાના ઘરે જ રહે છે અને કોઈ પણ જાહેર કાર્યક્રમમાં હાજરી આપતા નથી. અડવાણીને આ વર્ષે દેશના સર્વોચ્ચ સન્માન ભારત રત્નથી પણ નવાજવામાં આવ્યા હતા. પરંતુ સ્વાસ્થ્યના કારણોસર તેઓ રાષ્ટ્રપતિ ભવન ખાતેના કાર્યક્રમમાં હાજર રહી શક્યા નહોતા.

તેમને તેમના નિવાસસ્થાને જ ભારત રત્ન આપવામાં આવ્યો હતો. આ દરમિયાન વડાપ્રધાન નરેન્દ્ર મોદી, ઉપરાષ્ટ્રપતિ જગદીપ ધનખડ, કેન્દ્રીય ગૃહ પ્રધાન અમિત શાહ અને કેન્દ્રીય રક્ષા મંત્રી રાજનાથ સિંહ પણ તેમના નિવાસસ્થાને હાજર હતા. તેમને 2015માં પદ્મ વિભૂષણ એવોર્ડ પણ આપવામાં આવ્યો હતો. વાજપેયી સરકારમાં અડવાણી નાયબ વડાપ્રધાન હતા. તેઓ દેશના ગૃહમંત્રી પણ રહી ચૂક્યા છે.