કર્ણાટક કોંગ્રેસમાં સત્તા વહેંચણીનો વિવાદ ફરી એકવાર ગરમાયો છે. સૌથી મોટો પ્રશ્ન એ છે કે, જો હાઇકમાન્ડ ડી.કે. શિવકુમારને 2.5 વર્ષ રાહ જોવા માટે મનાવી શકે છે, તો બીજી તરફ સિદ્ધારમૈયાને તેમનું વચન પાળવા માટે કેમ મનાવી શકતું નથી? aajtak.inના રિપોર્ટ મુજબ, કોંગ્રેસના નજીકના સૂત્રોએ જણાવ્યું હતું કે, 2023માં સત્તામાં પાછા ફર્યા બાદ, બંને નેતાઓ એક ફોર્મ્યુલા પર સંમત થયા હતા. સિદ્ધારમૈયા પહેલા અડધા કાર્યકાળ અને શિવકુમાર બાકીના 2.5 વર્ષ મુખ્યમંત્રી રહેશે.
બંધ બારણે થયેલી વાતચીતમાં શિવકુમારે પ્રારંભિક કાર્યકાળની માગણી કરી હતી, જેને સિદ્ધારમૈયાએ વરિષ્ઠતાનો સંદર્ભ આપીને નકારી કાઢી હતી. લાંબી ચર્ચા બાદ સમાધાન થયું અને સિદ્ધારમૈયાએ ડૉ. ડીકે સુરેશ સામે કહ્યું હતું કે, ‘હું સિદ્ધારમૈયા છું, હું મારું વચન પાળીશ. હું 2.5 વર્ષ પૂરા થાય તેના એક અઠવાડિયા પહેલા રાજીનામું આપી દઇશ.’ પરંતુ સમય જતા સિદ્ધારમૈયાનું વલણ બદલાયું. જુલાઈ 2025 સુધી, તેમણે વારંવાર કહ્યું કે, ‘સરકાર પૂરા પાંચ વર્ષ સુધી ચાલશે.’ જોકે, 22 નવેમ્બરના રોજ મલ્લિકાર્જુન ખડગેને મળ્યા બાદ, તેમનો પોતાનો સ્વર નરમ પડ્યો અને નિર્ણય હાઇકમાન્ડ પર છોડી દીધો.
પાર્ટીના અધિકારીઓની નજીકના સૂત્રોનું કહેવું છે કે, જો ડી.કે. શિવકુમાર મુખ્યમંત્રી બને તો પણ, ઇતિહાસ હવે સિદ્ધારમૈયા પર પાર્ટીને પાછું આપવાની નૈતિક જવાબદારી મૂકશે. કોંગ્રેસમાં બહારના વ્યક્તિ તરીકે જોડાયા હોવા છતા સિદ્ધારમૈયા કર્ણાટકમાં એકમાત્ર નેતા છે જેમણે પાર્ટીના સૌથી શક્તિશાળી હોદ્દાઓનો સંપૂર્ણ લાભ મેળવ્યો છે. પાર્ટીમાં એક મત વધી રહ્યો છે કે કોંગ્રેસે સિદ્ધારમૈયાને સતત મોટું પદ આપ્યું છે. લગભગ 8 વર્ષ મુખ્યમંત્રી તરીકે, 5 વર્ષ વિપક્ષના નેતા તરીકે અને 1.5 વર્ષ સંકલન સમિતિના વડા તરીકે. એવામાં હવે નૈતિક રીતે તેમણે પાર્ટીને વળતર આપવું જોઈએ.
તો ડીકે શિવકુમાર કુશળતા અને ધીરજ સાથે રાહ જોઈ રહ્યા છે. પાર્ટીમાં એક માન્યતા છે કે કર્ણાટકમાં સત્તાનું સંતુલન રાજસ્થાન કે છત્તીસગઢ જેવું નથી. અહીં બળવાની કિંમત ખૂબ વધારે છે. આગામી અઠવાડિયા નક્કી કરશે કે આ 2.5 વર્ષનો કરાર વાસ્તવિકતા બનશે કે ભારતીય રાજકારણમાં બીજી અધૂરી કહાની બનીને રહી જશે.
શિવકુમારના નજીકના મંત્રીઓનું કહેવું છે કે મંત્રીમંડળની રચના દરમિયાન, કોંગ્રેસના નેતાઓએ મંત્રી પદના ઉમેદવારોને કહ્યું હતું કે તેઓ 2.5 વર્ષ સુધી સેવા આપશે, ત્યારબાદ જ્યારે શિવકુમાર નેતૃત્વ સંભાળશે, ત્યારે વિભાગોમાં ફેરબદલ કરવામાં આવશે.
પહેલાં સિદ્ધારમૈયા, મીડિયાના પ્રશ્નોના જવાબ આપતા કહેતા હતા કે કોંગ્રેસ સરકાર તેનો પાંચ વર્ષનો કાર્યકાળ પૂર્ણ કરશે. 2 જુલાઈ, 2025ના રોજ તેમનું વલણ કડક અને સખત થઈ ગયું, જ્યારે તેમણે જાહેરાત કરી કે તેઓ સંપૂર્ણ કાર્યકાળ માટે મુખ્યમંત્રી રહેશે. 5 જુલાઈથી 21 નવેમ્બર સુધી, તેમણે સતત આ વલણનો બચાવ કર્યો. પરંતુ 22 નવેમ્બરના રોજ બેંગલુરુમાં મલ્લિકાર્જુન ખડગે સાથે મોડી રાત્રે થયેલી બેઠક બાદ તેમનું વલણ નરમ પડ્યું. મીડિયા સાથે વાત કરતા તેમણે કહ્યું, સત્તા વહેંચણીના મુદ્દા પર હાઇકમાન્ડ નિર્ણય લેશે. 24 નવેમ્બરના રોજ તેમણે વધુમાં કહ્યું કે, ‘જો હાઇકમાન્ડ ઈચ્છશે તો હું ચાલુ રાખીશ.’
પક્ષના આંતરિક લોકોને યાદ છે કે સિદ્ધારમૈયાએ પહેલા પણ આવા જ જાહેર દાવા કર્યા હતા. તેમણે 2013ને પોતાની છેલ્લી ચૂંટણી જાહેર કરી અને 2018ની ચૂંટણી લડી, ચામુંડેશ્વરી બેઠક હારી ગયા પણ બદામી બેઠક પર જીતી ગયા. તેમણે 2023ની ચૂંટણી ફરી લડી, પરંતુ પહેલા મુખ્યમંત્રી તરીકે 2.5 વર્ષનો કાર્યકાળ માંગ્યો. ટીકાકારોનો આરોપ છે કે આ વ્યૂહાત્મક ઉલટફેરનું એક પેટર્ન છે.
બોલ હવે કોંગ્રેસ હાઇકમાન્ડના હાથમાં છે. સમયમર્યાદા નજીક આવી રહી છે અને આંતરિક જૂથવાદ ચાલી રહ્યો છે, આગામી અઠવાડિયા નક્કી કરશે કે 2.5 વર્ષનો કરાર વાસ્તવિકતા બને છે કે ભારતીય રાજકારણમાં બીજું એક ફિક્કું પડતું વચન છે.