જો અમે સત્તામાં આવીશું, તો અમે જાતિગત વસ્તી ગણતરી કરીશું, રાહુલ ગાંધીએ સરકારને ઘેરતા કરી જાહેરાત

કોંગ્રેસ સાંસદ રાહુલ ગાંધીએ જાતિ ગણતરીને લઈને મોટી જાહેરાત કરી છે. તેમણે સોમવારે કહ્યું કે જો અમારી સરકાર સત્તામાં આવશે તો અમે જાતિગત વસ્તી ગણતરી કરીશું. રાહુલ ગાંધીએ છત્તીસગઢના બિલાસપુરમાં જનસભાને સંબોધતા આ જાહેરાત કરી હતી. રાહુલ ગાંધીએ કહ્યું, દેશની સરકાર 90 સચિવો દ્વારા ચલાવવામાં આવે છે, જેમાંથી માત્ર 3 OBC છે. પીએમ મોદી જાતિની વસ્તી ગણતરી નથી ઈચ્છતા. જાતિ ગણતરીથી દેશને ફાયદો થશે.

રાહુલ ગાંધીએ કહ્યું કે નરેન્દ્ર મોદી જ્યાં પણ જાય છે ત્યાં ઓબીસીની વાત કરે છે, કોંગ્રેસ પાર્ટીએ જાતિગત જનગણના કરાવી હતી. ભારતમાં દરેક જાતિના કેટલા લોકો છે તેના આંકડા સરકાર પાસે છે. મોદીજી એ આંકડા લોકોને બતાવવા માંગતા નથી. કેમ બતાવવા માંગતા નથી, ચાલો હું તમને કહું.

કોંગ્રેસ સાંસદે કહ્યું કે મેં એક આંકડો કાઢ્યો છે. સરકાર ધારાસભ્યો અને સાંસદો દ્વારા ચલાવવામાં આવતી નથી. સચિવ દ્વારા ચલાવવામાં આવે છે. જે પણ યોજના બનાવવામાં આવે છે, કેન્દ્રના 90 સચિવો યોજના બનાવે છે. મેં જોયું કે તે 90 લોકોમાંથી કેટલા પછાત વર્ગના હતા. માત્ર 3 લોકો OBC સમુદાયના છે. રાહુલ ગાંધીએ કહ્યું કે જાતિ ગણતરી એ દેશનો એક્સ-રે છે. તેનાથી ખબર પડશે કે દેશમાં કેટલા દલિત, આદિવાસી અને સામાન્ય વર્ગના લોકો છે અને એકવાર આ ડેટા લોકોના હાથમાં આવશે તો દેશ તમામ લોકોને ધ્યાનમાં રાખીને આગળ વધી શકશે.

તેમણે કહ્યું કે ઓબીસી, દલિતો, આદિવાસીઓ અને મહિલાઓની ભાગીદારી સુનિશ્ચિત કરવા માટે જાતિ ગણતરી જરૂરી છે. જો ચૂંટણી બાદ કોંગ્રેસ સત્તામાં આવશે તો જાતિ ગણતરી કરાવશે. રાહુલ ગાંધીએ ગૌતમ અદાણીના મુદ્દે પણ સરકારને ઘેરી હતી.

તેમણે કહ્યું કે જ્યારે મેં વડાપ્રધાન મોદીના અદાણી સાથેના સંબંધો પર પ્રશ્નો પૂછ્યા ત્યારે મારી લોકસભાની સદસ્યતા રદ કરવામાં આવી હતી. બે રીમોટ કંટ્રોલ ચાલુ છે. જ્યારે આપણે રિમોટ કંટ્રોલ દબાવીએ છીએ ત્યારે ખેડૂતોના ખાતામાં પૈસા આવે છે, પરંતુ જ્યારે ભાજપ રિમોટ કંટ્રોલ દબાવે છે ત્યારે જાહેર ક્ષેત્રનું ખાનગીકરણ થાય છે અને ‘જલ-જંગલ-જમીન’ અદાણીના પક્ષમાં જાય છે.