કપડાની દુકાનવાળો ક્રિકેટર લઇ ગયો દસે-દસ વિકેટ, રચ્યો ઈતિહાસ

થોડા અઠવાડિયા બાદ ભારતીય ટીમ ન્યૂઝીલેન્ડ સામે રમશે. બંને ટીમો વચ્ચે ટેસ્ટ સીરિઝ રમાશે, જેમાંથી એક મેચ મુંબઈમાં રમાશે. ત્રણ વર્ષ અગાઉ મુંબઈમાં બંને ટીમો વચ્ચે ટેસ્ટ મેચ રમાઈ હતી, જેમાં ન્યૂઝીલેન્ડના લેફ્ટ આર્મ સ્પિનર ​​એજાજ પટેલે એક ઈનિંગમાં તમામ 10 વિકેટ ઝડપી હતી. તે આ ટેસ્ટ સીરિઝનો પણ ભાગ હશે. પરંતુ તે સમયગાળા દરમિયાન, તે એક ઇનિંગ્સમાં 10 વિકેટ લેનારો મહારાષ્ટ્રનો એકમાત્ર બોલર નહીં હોય. એજાજની જેમ મુંબઈથી થોડે દૂર ભિવંડીમાં એક લેફ્ટ આર્મ સ્પિનર ​​હાજર હશે, જેણે મુંબઈમાં જ 10 વિકેટ લેવાનું કારનામું કર્યું છે. નામ છે શોએબ ખાન.

આ આશ્ચર્યજનક નજારો 22 સપ્ટેમ્બર, રવિવારના રોજ મુંબઈમાં એક સ્થાનિક ટૂર્નામેન્ટમાં જોવા મળ્યો હતો, જ્યાં શોએબ ખાને વિરોધી ટીમની તમામ 10 વિકેટો લીધી હતી. હવે, ઇજાજની જેમ, શોએબે આ કારનામું કોઈ ટેસ્ટ મેચ કે કોઈ ફર્સ્ટ ક્લાસ મેચમાં કર્યું નથી, પરંતુ સ્થાનિક ટૂર્નામેન્ટ, કાંગા લીગમાં કર્યું છે. પરંતુ ક્રિકેટનું સ્તર ભલે ગમે તે હોય, બધી 10 વિકેટ લેવી એ મજાક નથી અને કાંગા લીગ એ મુંબઈના સ્થાનિક ક્રિકેટની ઓળખ છે, જેમાં સચિન તેંદુલકરે પણ મોટું નામ બનવા અગાઉ પોતાની પ્રતિભા બતાવી હતી. તેને મુંબઈ ક્રિકેટ એસોસિએશન દ્વારા ચલાવવામાં આવે છે.

શોએબે આ અદ્ભુત પરાક્રમ ગૌડ-સારસ્વત ક્રિકેટ ક્લબ અને જોલી ક્રિકેટર્સ વચ્ચે ડિવિઝન E મેચમાં કર્યું હતું. લેફ્ટ આર્મ સ્પિનર ​​શોએબે થાક્યા વિના જોલી ક્રિકેટર્સ સામે સતત 17.4 ઓવર ફેંકી અને એક પછી એક તમામ 10 વિકેટ લઈને ઈતિહાસ રચ્યો હતો. તેની બોલિંગના આધારે જોલી ક્રિકેટર્સ પ્રથમ દાવમાં માત્ર 67 રનમાં ઓલઆઉટ થઈ ગઈ હતી. શોએબની ટીમે તેનો પ્રથમ દાવ 69 રન બનાવીને ડિક્લેર કર્યો હતો, જ્યારે બીજી ઈનિંગમાં જોલી ક્રિકેટર્સ 3 વિકેટ ગુમાવીને માત્ર 36 રન જ બનાવી શકી હતી.

ગૌડ-સારસ્વત ટીમે પ્રથમ દાવમાં 2 રનની લીડના આધારે જીત મેળવી હતી. મિડડે અખબારના અહેવાલ મુજબ, શોએબ ખાન મુંબઈ નજીક ભિવંડીમાં કપડાંની દુકાન ચલાવે છે. લગભગ 10 વર્ષ અગાઉ પણ આ ટૂર્નામેન્ટની એક મેચમાં શોએબે ઈનિંગમાં 7 વિકેટ લઈને ટીમને જીત અપાવી હતી. ત્યારે તે બીજા કોઈ ક્લબ માટે રમતો હતો. આ વખતે તેણે 10 વિકેટ લઈને ઈતિહાસ રચ્યો હતો. આ પ્રદર્શન માટે ગૌર-સારસ્વત ક્રિકેટ ક્લબના માલિક રવિ માંડરેકરે તેને 10,000 રૂપિયાનું ઈનામ પણ આપ્યું હતું.