જાણો રાહુલ ગાંધીએ હરિયાણામાં હાર માટે કયા નેતાઓને જવાબદાર ઠેરવ્યા
કોંગ્રેસ હરિયાણા વિધાનસભા ચૂંટણીમાં મળેલી હારને પચાવી શકતી નથી. પરિણામે જીતને લઈને ખૂબ જ આત્મવિશ્વાસ ધરાવતી કોંગ્રેસે આ પરિણામોનું વિશ્લેષણ કરવા ગુરુવારે એક ઉચ્ચ સ્તરીય બેઠક પણ બોલાવી હતી. આ બેઠકમાં ખુદ રાહુલ ગાંધી પણ હાજર રહ્યા હતા. હરિયાણાના ચૂંટણી પરિણામો પર હજુ સુધી કોઈ પ્રતિક્રિયા ન આપનાર રાહુલ ગાંધીએ આજે આ મુદ્દે પોતાનો અભિપ્રાય વ્યક્ત કર્યો હતો. તેમણે હરિયાણામાં કોંગ્રેસની હાર માટે રાજ્યના કોંગ્રેસના નેતાઓને જવાબદાર ઠેરવ્યા હતા. જો કે તેમણે કોઈનું નામ લીધું નહોતું, પરંતુ તેમણે આપેલા નિવેદન પરથી તેમની નારાજગી સ્પષ્ટપણે જોવા મળે છે.
પરિણામો પર મંથન કરવા આવેલા રાહુલ ગાંધીએ હરિયાણાની હાર પર મોટી વાત કહી. તેમણે કહ્યું કે હરિયાણામાં નેતાઓનો ઇંન્ટરેસ્ટ વધારે રહ્યો, જ્યારે પાર્ટીનો ઇંન્ટરેસ્ટ નીચે જતો રહ્યો. જો કે રાહુલ ગાંધીએ કોઈ નેતાનું નામ લીધું નહોતું, પરંતુ તેમણે ઇશારાઓમાં બતાવી દીધું કે કયા કારણે હરિયાણામાં પાર્ટીને હારનો સામનો કરવો પડ્યો. વાસ્તવમાં કોંગ્રેસે હરિયાણાની હાર પર મંથન કરવાનો નિર્ણય લીધો છે. પ્રદેશ કોંગ્રેસના નેતાઓ સાથે આ મંથન કરવામાં આવશે. જેમાં આજે કોંગ્રેસ અને હરિયાણાના AICC નેતાઓ સાથે બેઠક યોજાઈ હતી.
તેમાં ચૂંટણીની મતગણતરીમાં ગેરરીતિઓ અને હરિયાણા કોંગ્રેસમાં મતભેદો અંગે ચર્ચા થઈ હતી. રાજ્યના નેતાઓ સાથેની બેઠક બાદ આ સમગ્ર મુદ્દે કાર્યવાહી કરવામાં આવશે. હરિયાણા ચૂંટણી સાથે જોડાયેલા વરિષ્ઠ નિરીક્ષકે હરિયાણા અંગેના પોતાના પ્રારંભિક અહેવાલમાં મલ્લિકાર્જૂન ખડગે અને રાહુલ ગાંધીને આ માહિતી આપી છે.
કોંગ્રેસ અધ્યક્ષ ખડગે, રાહુલ ગાંધી, વેણુગોપાલ, અજય માકન અને અશોક ગેહલોતે હરિયાણાને લઈને તેના પર ચર્ચા કરી. તેમજ હરિયાણાને લઈને કોંગ્રેસની ફેક્ટ ફાઈન્ડિંગ કમિટી બનાવવાનો નિર્ણય લેવામાં આવ્યો હતો. ફેક્ટ ફાઈન્ડિંગ કમિટી કોંગ્રેસના ઉમેદવારો અને રાજ્યના નેતાઓને મળશે અને પોતાનો રિપોર્ટ કોંગ્રેસ અધ્યક્ષને સોંપશે. કોંગ્રેસ આજે ફેક્ટ ફાઇન્ડિંગ કમિટીની જાહેરાત કરે તેવી શક્યતા છે. ફેક્ટ ફાઈન્ડિંગ કમિટી પોતે રાજ્યના નેતાઓ ભૂપેન્દ્ર સિંહ હુડ્ડા, ઉદય ભાન, રણદીપ સૂરજેવાલા અને કુમારી સેલજાને મળશે.
તમારા મોબાઈલ પર તમામ પ્રકારના લેટેસ્ટ ન્યૂઝના અપડેટ્સ મેળવવા માટે નીચે અપેલા બટન પર ક્લિક કરીને અમારા વોટ્સેપ ગ્રુપમાં જોડાવ.
Join WhatsApp